Moodle - MKnet

Inna - upplýsingakerfi skóla

Póstur kennara

Tölvur / Fartölvur

Menntaskólinn í Kópavogi er fartölvuskóli og er gert ráð fyrir að allir nemendur skólans hafi fartölvu til umráða. Námsumhverfið Moodle (sem líkja má við kennslustofu á Internetinu) er notað í öllum áföngum skólans og stórum hluta verkefna er skilað með rafrænum hætti. Í skólanum er þráðlaust netkerfi og hægt er að komast á staðarnet skólans í öllum kennslustofum.

Hér koma gagnlegar upplýsingar fyrir fartölvunotendur í MK

Stýrikerfi

Windows tölvur eru með stýrikerfinu Windows 10. Önnur stýrikerfi, t.d. Linux, hafa einnig reynst ágætlega. Fyrir Mac notendur ganga allar nýjustu útgáfurnar of Mac OS stýrikerfinu.

Notendahugbúnaður

Allir nemendur þurfa að vera með hugbúnað fyrir ritvinnslu og glærugerð og einnig töflureikni í tölvum sínum. Skólinn lætur nemendum í té Office hugbúnaðinn með þessum forritum og er hann innifalinn í skólagjöldum. Nánari upplýsingar um hugbúnaðinn eru veittar í tölvuþjónustu.

Vírusvörn

Notendum á staðarneti MK er skylt að vera með virka vírusvörn í tölvum sínum. Vörnin er innifalin í Windows stýrikerfinu og heitir Windows Defender.

Viðhald

Til að tölvan gagnist best sem verkfæri við námið þarf hún að vinna bæði fljótt og vel. Þess vegna verður að gæta þess að vera með góðar varnir gegn ýmsum kvillum og aðskotahugbúnaði sem getur borist af netinu og með tölvupósti. Einnig er mikilvægt að uppfæra stýrikerfi tölvunnar reglulega.

Þráðlaust netkort

Þráðlaus netkort eru innbyggð í öllum fartölvum í dag. Netið sem nemendur hafa aðgang að heitir MK-Nemendur og er opið og án passorðs. Nemendum er óheimilt að nota önnur þráðlaus netkerfi skólans.

Moodle, INNA og aðgangur að tölvum skólans

Nýir nemar í MK fá afhent notendanöfn og lykilorð að öllum tölvukerfum um leið og þeir hefja nám við skólann. Nemendur bera ábyrgð á lykilorðum sínum og þurfa að passa þau vel. Ekkir er sniðugt að vista lykilorð í tölvum. Betra er að koma sér upp einhvers konar kerfi og skrá lykilorð til minnis í gsm síma, í dagbók eða á góðum stað heima. Hægt er að virkja sérstaka þjónustu í INNU og Moodle til að endurheimta gleymd lykilorð.

Óæskilegur hugbúnaður

Það getur verið tímafrekt og vandasamt verk að fjarlægja veirur úr tölvu og þarf oft sérfræðinga og ýmis hjálpartæki til þess að vinna það verk. Sumir vírusar, ormar eða annar óæskilegur hugbúnaður (spyware, malware, trojans) eru jafnvel forritaðir þannig að þeir setja sig inn aftur þrátt fyrir að þeim hafi verið eytt eða verið fjarlægðir úr tölvunni. Með því að skanna tölvuna reglulega með ókeypis (eða ódýrum) hugbúnaði er sem betur fer hægt að halda þessu í nokkuð góðu lagi.

Hvað er tölvuvírus?

Tölvuvírus er hugbúnaður sem er sérstaklega hannaður til að eyðileggja eða trufla stýrikerfi tölvunnar, skemma gögn, dreifa sér til annarra tölva eða út á Internetið. Tölvuvírusar leita uppi þá tölvunotendur sem eru ekki á varðbergi og fá þá til að dreifa vírusunum án þess þó að þeir geri sér nokkra grein fyrir að þeir séu að gera það. Vírusar og önnur óværa dreifa sér helst með tölvupósti og á spjallrásum.  

Nokkur ráð til að verjast því að fá vírusa í tölvuna

  • Vertu á varðbergi þegar þú vafrar á netinu, hleður niður skrám eða opnar viðhengi.
  • Notaðu eldvegg.
  • Uppfærðu stýrikerfi tölvunnar og vírusvarnarhugbúnaðinn reglulega (stilltu á sjálfvirka uppfærslu).
  • Ekki opna tölvupóstsviðhengi frá einhverjum sem þú þekkir ekki.
  • Ekki opna tölvupóstsviðhengi nema að þú vitir hvað það er þótt þú þekkir viðkomandi.
  • Sendandi veit e.t.v. ekki að tölvan hans er smituð.
  • Lestu skilaboðin sem birtast á skjánum.

Aðferðir við að fjarlægja vírusa eða óæskilegan hugbúnað

  • Uppfærðu stýrikerfi tölvunnar ef það gerist ekki sjálfkrafa.
  • Uppfærðu vírusvörnina eftir þörfum (Gerist sjálfkrafa á Windows Defender)
  • Ef vírusvörnin þín fjarlægir ekki sýktu skrárnar gætir þú prófað að sækja hugbúnað á borð við Malicious Software Removal Tool og skanna með honum.
  • Skannaðu tölvuna með nýjustu uppfærslunni af Windows Defender. Það er ótrúlega mikið sem finnst við slíka leit.Eyddu öllu óæskilegu efni.
  • Ef þú kemst ekki á Netið til að sækja hugbúnaðinn sem mælt er með hér að ofan vegna þess að tölvan þín er orðin illa smituð getur verið ráð að nálgast hugbúnaðinn í annarri tölvu og flytja á milli, með því að vista hann á USB lykli.
  • Leitaðu aðstoðar í þjónustuveri MK ef þú ert í vafa eða þarft á hjálp að halda.  

Uppfært fimmtudagur, 10 ágúst 2017 12:50

Go to top