Afrekssvið MK
Athugið að til að umsókn sé tekin gild þarf að berast umsókn á menntagatt.is ásamt meðmæli frá þjálfara.
Skilyrði fyrir þátttöku er að nemandi sé að æfa íþrótt í skipulögðu íþróttastarfi undir handleiðslu þjálfara, með það markmið að ná árangri í keppni í greininni.
Athugið að einungis eftirfarandi aðilar mega gefa meðmæli í okkar fjölmennustu samstarfsfélögum:
Kristinn Þór Guðlaugsson - Gerpla hópfimleikar
Þorgeir Ívarsson - Gerpla áhaldafimleikar
Davíð Elí Heimisson - HK handbolti
Ragnar Már Sigrúnarson og Eysteinn Húni Hauksson - HK fótbolti
Emil Gunnarsson og Bryan Silva - HK blak
Mikael Máni Hrafnsson - Breiðablik körfubolti
Andri Vilbergsson og Guðjón Gunnarsson - Breiðablik fótbolti
Ágúst Björgvinsson - Valur körfubolti
Anton Rúnarsson og Óskar Bjarni Óskarsson - Valur handbolti
Sverrir Þór Kristinsson - Valur fótbolti
Grétar Áki Andersen - ÍR handbolti
Halldór Arnarson - ÍR knattspyrna
Þórður Einarsson - Þróttur knattspyrna
Björn Breiðfjörð - KR knattspyrna
Íþróttafólk í öðrum greinum og/eða öðrum félögum sem eru ekki talin upp hér að ofan skulu gæta þess að meðmæli berist frá núverandi aðalþjálfara síns flokks eða yfirþjálfara í sínu félagi.
Afrekssvið Menntaskólans í Kópavogi býður upp á kröfuhart nám með sveigjanleika fyrir metnaðarfullt íþróttafólk. Afrekssviðið var stofnað þann 11. apríl 2019 af Menntaskólanum í Kópavogi, Breiðablik, Gerplu og Handknattleiksfélagi Kópavogs og er unnið í nánu samstarfi við þessi félög ásamt Golfklúbbi Kópavogs og Garðabæjar. Afreksviðið er opið íþróttafólki úr öllum íþróttafélögum og er sniðið að því sem er talið henta hverjum einstaklingi. Alls koma nemendur úr rúmlega 40 íþróttafélögum og rúmlega 20 greinum víðs vegar af landinu en meðal okkar stærstu samstarfsfélaga eru Valur, KR, Þróttur og ÍR.
Tekið skal sérstaklega fram að við tökum vel á móti fötluðu keppnisíþróttafólki ef það gengur upp fyrir þau að stunda nám í MK að öðru leiti og höfum haft fatlað íþróttafólk innan okkar raða undanfarin ár.
Nemendur á afrekssviði skrá sig á bóknámsbraut á afrekssviði. Nám þeirra inniheldur kjarnafög úr náttúrufræði, félagsfræði eða viðskiptafræðibrautum ásamt því að stór hluti valáfanga fer undir áfanga á afrekssviði. Nemendur á framhaldsskólabraut og opinni braut geta einnig skráð sig á afrekssvið.
Fagstjóri: Daði Rafnsson
Netfang: dadi.rafnsson@mk.is
Tvöfaldur ávinningur - Dual career nám fyrir íþróttafólk
Afrekssvið Menntaskólans í Kópavogi horfir til kenninga og leiðbeininga í “dual career” fræðum við uppbyggingu sviðsins. Segja má að íþróttafólk fái tvöfaldan ávinning af því að stunda nám sem tekur tillit til íþróttaiðkunnar þeirra. Það getur stefnt hátt í íþróttinni og um leið og það stundar nám sem gefur því aukin tækifæri og gerir það að heilsteyptari manneskjum.
Við gerum okkur grein fyrir því að ferill hvers íþróttamanns eða konu er einstakur og að það er okkar að gefa öllum þeim sem sýna metnað tækifæri á að þroskast og þróast. Á sviðinu eru nemendur sem eru nú þegar afreksfólk í sínu fagi og aðrir sem eiga enn eftir að ná markmiðum sínum. Það sem mestu máli skiptir er að tileinka sér siði og venjur sem einkennir afreksíþróttafólk.
Eitt helsta markmið afrekssviðsins er að gera nemendur sviðsins bæra um að afla sér upplýsinga um og taka ábyrgð á þáttum sem gera þau að öflugra íþróttafólki. Við vinnum mikið með 5C hugmyndafræði Chris Harwood sem snýr að skuldbindingu, samskiptum, einbeitingu, sjálfsstjórn og sjálfstrausti.
Afrekssviðið er aðili að European Dual Career Network og hefur leiðbeiningar Evrópusambandsins um dual career nám að leiðarljósi við uppbyggingu sviðsins.
Inntökuskilyrði
- Nemendur verða að hafa lokið grunnskólaprófi
- Nemendur eru virkir iðkendur í íþróttafélagi og stundi íþróttina af metnaði
- Meðmæli frá íþróttafélagi viðkomandi
- Samþykki um vímuefnalausan lífsstíl
Nemendur á afrekssviði greiða hefðbundin skólagjöld og að auki 46.500 á önn. Aukagreiðslan er vegna umjsónar, þjálfunar, ráðgjafar, aðkeyptra fyrirlesara, fyrirbyggjandi æfingar í samstarfi við sjúkraþjálfara, íþróttafatnaðar o.fl.
Helstu kostir afrekssviðsins
Öflugt utanumhald frá fagstjóra, kennurum, áfangastjóra, námsráðgjöfum, forvarnarfulltrúa og þjálfurum sem aðstoða nemendur við að sníða námið að eigin þörfum og veita úrræði ef eitthvað kemur upp á. Nemendur á afrekssviði hafa til að mynda tvo umsjónarkennara sem þeir geta leitað til
Leyfi frá skóla er ávallt veitt óski þjálfari eða félag viðkomandi eftir því svo fremi sem nemandi sýni viðunandi námsframvindu
Fjórar kennslustundir í viku í verklegu og bóklegu námi tengdum íþróttum á afrekssviði
Viðburðir, fyrirlestrar frá sérfræðingum, verkefni sem tengjast íþróttaiðkun
Jafningjastuðningur frá öðrum nemendum á afrekssviði
Námstími
Námstími til stúdentsprófs er þrjú ár og þarf nemandi að ljúka 33-34 einingum á önn til að ljúka á þeim tíma. Nemendur á afrekssviði fá 5 einingar á önn í sex annir fyrir þáttöku á sviðinu.
Algengar spurningar um afrekssviðið
Hvernig sendi ég meðmæli?
Þjálfari sendir meðmæli í gegnum hlekkinn hér að neðan
Meðmæli þjálfara
Þarf að æfa með íþróttafélagi í Kópavogi til að fá inngöngu?
Nei
Þarf ég að vera með lágmarks meðaleinkunn úr grunnskóla?
Ekki er gerð krafa um lágmarks meðaleinkunn. Mörg dæmi eru um að nemendur á Afrekssviði hefji nám á framhaldsskólabraut.
Þarf ég að hafa náð afreksárangri í minni íþrótt til að fá inngöngu?
Ekki er gerð krafa um afreksárangur í íþróttum fyrir framhaldsskóla, en ætlast er til að nemendur nálgist íþrótt sína og nám með hugarfar afreksfólks að markmiði.
Er námið í MK krefjandi?
Nemendur frá Afrekssviði hafa fengið inngöngu í suma af mest krefjandi háskólum í heimi.
Hvað þýðir sveigjanleiki?
Við hjálpum þér að stilla upp námshraða sem hentar þér. Einnig geta nemendur Afrekssviðs fengið leyfi frá skólanum til íþróttaiðkunnar að uppfylltum skilyrðum.
Hver eru skilyrðin fyrir leyfi frá skóla?
Íþróttafélög og sérsambönd geta óskað eftir leyfi fyrir nemendur Afrekssviðs. Þeim ber að tilkynna ástæðu og lengd tíma frá skóla. Nemendur bera ábyrgð á því að upplýsa kennara sína og gera ráðstafanir í samvinnu við þá um hvernig haga skal verkefnaskilum. Foreldrar og nemendur geta ekki sótt sjálf um leyfi vegna íþróttaiðkunnar, en geta sótt um annars konar leyfi eins og aðrir nemendur skólans til skólaskrifstofu.
Eru gerðar meiri kröfur til nemenda Afrekssviðs en annarra nemenda um hegðun?
Nemendur Afrekssviðs lúta sömu reglum og aðrir nemendur varðandi agavandamál eða eignaspjöll og eru þau tekin fyrir af stjórnendum skólans. Alvarleg og endurtekin óæskileg hegðun nemanda, þar á meðal með því að beita aðra ofbeldi, kynþáttahatri, einelti eða niðurlægingu getur leitt til brottvísunar af sviðinu. Verði nemandi uppvís að því að brjóta landslög og reglur skólans hvað þau varðar getur það leitt til brottvísunar af sviðinu. Falli nemandi Afrekssviðs á lyfjaprófi, eða er staðinn að ólöglegum veðmálum er viðkomandi umsvifalaust vísað af Afrekssviði.