NMK - Nemendafélag Menntaskólans í Kópavogi

Nemendafélag Menntaskólans í Kópavogi á sér jafnlanga sögu og skólinn sjálfur, stofnað mánudaginn 1. október 1973 af 7 nemendum, einn úr hverri bekkjardeild skólans. Megintilgangur með stofnun félagsins var að efla samheldni meðal nemenda og félagsþroska þeirra og er hann er í fullu gildi.

Í MK eru allir með og mikil áhersla er lögð á að virkja nemendur til þátttöku í félagslífi skólans.

Nemendafélag Menntaskólans í Kópavogi, öðru nafni NMK, samanstendur af stjórn, skemmtinefnd, íþróttanefnd, Dívunni (fjölmiðlanefnd), Ísvélinni (myndbandsnefnd), spilanefnd, jafnréttisnefnd, Dívunni (fjölmiðlanefnd), Froðunni (tækninefnd), leikfélaginu, Tyllidaganefnd og fleirum.

Stjórn NMK veitir öðrum nefndum stuðning og er með yfirsýn yfir starf þeirra. Formaður, varaformaður, gjaldkeri, margmiðlunarstjóri og ritari gegna öll mikilvægum hlutverkum sem gera öðrum nefndum kleift að blómstra.

Skemmtinefnd sér um að skipuleggja nýnemaballið, árshátíðina og fleiri fjölbreytta og skemmtilega viðburði og reglulega eru haldnir allskonar minni viðburðir til að brjóta upp hversdaginn, bæði í frímínútum og á kvöldin. Böll eru haldin reglulega yfir skólaárið en nýnemaballið markar upphaf haustannar og árshátíðin er hápunktur vorannar. Árshátíðin er stór viðburður þar sem nemendur og starfsfólk skólans skemmta sér saman. Útskriftarnemar í matvælagreinum sjá um glæsilega þriggja rétta máltíð fyrir árshátíðargesti og ýmis skemmtiatriði eru í boði.

Íþróttanefnd skólans stendur fyrir íþróttamótum af ýmsum toga. Þekktasta keppnin er MK -deildin þar sem hópar innan skólans keppa í fótbolta. Íþróttavika er einu sinni á önn og þá stendur íþróttanefndin m.a. fyrir ýmsum íþróttaviðburðum á og utan skólatíma.

Dívan (Fjölmiðlanefnd) gefur út eitt blað á önn með fréttum og fróðlegum viðtölum sem tengjast MK. Einnig sér Dívan um auglýsingar og myndatökur fyrir ýmsa viðburði

Ísvélin (myndbandsnefnd) tekur upp og gefur út einu sinni á önn, létt og skemmtilegt myndband þar sem sjá má aðra hlið á lífinu í MK.

Spilanefnd skipuleggur borðspilakvöld einu sinni í viku þar sem meðal annars er hópur sem spila reglulega Dungeons & Dragons.

Leikfélagið setur reglulega upp leiksýningar og meðal sýninga sem leikfélagið hefur sett upp eru Hairspray, Litla hryllingsbúðin og DNA.

Tyllidaganefnd stendur ásamt kennurum skólans fyrir Tyllidögum sem eru þemadagar í MK þar sem hefðbundið skólastarf er brotið upp, skólinn skreyttur og ýmis konar skemmtilegar uppákomur eru alla Tyllidagavikuna. Líf, fjör, söngur og skemmtun einkennir Tyllidagana sem eru góð tilbreyting í skólastarfinu.

Gettu betur hópurinn hjá okkur er fjölmennari en bara liðið. Þar koma þeir nemendur saman sem hafa áhuga á spurningarkeppnum og æfa sig saman. Úr þeim hópi er liðið svo valið.

Urpið er söngkeppni NMK en sigurvegari hennar tekur þátt í Söngkeppni framhaldsskólanna.

Á hverju ári verða til nýir klúbbar, hópar og viðburðir en allt veltur þetta á frumkvæði og hugmyndaauðgi nemenda. Í gegnum tíðina hafa verið starfræktir viðburðir og klúbbar eins og rafíþróttahópur, ostakvöld og andvökunótt svo fátt eitt sé nefnt. Allir ættu að finna eitthvað við sitt hæfi og nemendur eru hvattir til að taka þátt í félagslífi skólans.