Um skólann

Í Menntaskólanum í Kópavogi er í boði metnaðarfullt bóknám og verknám á mörgum brautum. Þar er einnig afrekssvið þar sem metnaðarfullt íþróttafólk, sem æfir undir handleiðslu þjálfara í skipulögðu íþróttastarfi,  getur valið nám til stúdentsprófs þar sem tekið er tillit til íþróttaiðkunar þeirra. Þá er í MK sérnámsbraut sem ætluð nemendum sem hafa notið verulegrar sérkennslu í grunnskóla, fengið kennslu í námsveri, sérdeild eða sérskóla.

Undir hatti Menntaskólans í Kópavogi er einnig Leiðsöguskólinn sem býður upp á nám til undirbúnings fyrir starf leiðsögumanns ferðamanna á Íslandi.

Stefna Menntaskólans í Kópavogi er að veita nemendum möguleika til menntunar og þroska á þeirra forsendum í framsæknum skóla. Skólinn kappkostar að bjóða hagnýtt og fjölbreytt nám sem undirbýr nemendur fyrir störf í atvinnulífinu eða frekara nám.

Menntaskólinn í Kópavogi leggur áherslu á þekkingu, þroska, þróun og þátttöku í allri starfsemi skólans með hag nemenda og starfsmanna að leiðarljósi. Menntaskólinn í Kópavogi er menntaskóli í víðasta skilningi, skóli bóklegra og verklegra mennta.

Merki skólans sýnir þrjár súlur á traustum grunni undir hvolfþaki. Súlurnar tákna skólana þrjá sem eru saman undir sama þaki Menntaskólans í Kópavogi. Bláa súlan táknar bóknámsskólann, græna súlan táknar leiðsöguskólann og rauða súlan táknar matvælaskólann.