FYHJ3FH01 - Fyrsta hjálp I

Fjallað er um aðgerðir á vettvangi, skoðun og mat. Endurlífgun kennd og þjálfuð. Farið er í helstu blæðingar, lost og viðbrögð við lostástandi. Teknar eru fyrir helstu tegundir sára, umbúðir og sárabindi. Farið er í helstu orsakir bruna, flokkun brunasára og skyndihjálp við bruna. Helstu höfuð-, háls- og hryggáverkum eru gerð skil ásamt brjóst-, kvið- og mjaðmaáverkum. Einnig er farið í beina-, liðamóta- og vöðvaáverka. Kennt er að spelka útlimi með áverka. Farið er í bráða sjúkdóma, eitranir, bit og stungur. Fjallað er um viðbrögð við kali og ofkælingu og háska af völdum hita. Farið er í björgun og flutning einstaklinga af slysstað. Mikilvægi sálrænnar skyndihjálpar áréttað.

Nemandi skal hafa öðlast þekkingu og skilning á:

• Þeirri hugmyndafræði sem Fyrsta hjálp byggir á.
• Framkvæmd mats og skoðun á slösuðum einstaklingum.
• Að bregðast við yfirvofandi lostástandi geta brugðist rétt við dauðadái.
• Helstu tegundum sára.
• Að meta brunasár og kunna að bregðast við bruna.
• Helstu höfuð-, háls-, og hryggáverkum og geta veitt fyrstu hjálp við slíkum áverkum.
• Helstu brjóst-, kvið-, og mjaðmaáverkum og geta brugðist við þeim.
• Helstu beina-, liðamóta-, og vöðvaáverkum og geta veitt skyndihjálp við slíkum áverkum.
• Spelkun við brot/tognanir.
• Fyrsta hjálp við bráðum sjúkdómum.
• Forvörnum við kali, ofkælingu og ofhitnun og geta veitt viðeigandi skyndihjálp við slíkum áverkum.
• Mikilvægi sálrænnar skyndihjálpar.
• Hvenær þörf er á að beita endurlífgun.

Nemandi skal hafa öðlast leikni í að:

• Bregðast við áverkum hvort sem þeir snúa að höfði, hálsi eða hrygg; brjósti, kvið eða mjöðmum; beinum, liðamótum eða vöðvum.
• Spelka við brotum eða tognunum.
• Eiga uppbyggileg samskipti við hinn slasaða.
• Beita grunnendurlífgun á börnum og fullorðnum.

Nemandi skal geta hagnýtt þá almennu þekkingu og leikni sem hann hefur aflað sér til að:

• Gera ferðir um landið öruggar og geta brugðist við óvæntum aðstæðum; slysum og óhöppum.
• Geta veitt fyrstu hjálp, tryggt vettvang, forgangsraðað slösuðum og undirbúið flutning slasaðra af slysstað.

Undanfari: Enginn.

Námsmat: Sjá kennsluáætlun.