FYHJ3GÖ01 - Fyrsta hjálp II

Í áfanganum er byggt ofan á þann grunn sem lagður er í undanfaranum FYHJ3FH01, svo sem meðhöndlun meiðsla og veikinda. Farið er í skráningu og tilkynningu slysa. Einnig viðbrögð við hópslysi og dauðsföllum. Fjallað er um viðbrögð við kali og ofkælingu. Leiðbeint er um forgangsröðun á vettvangi, aðbúnað slasaðra og flutning af slysstað, móttöku þyrlu og áfallahjálp á slysstað.

Nemandi skal hafa öðlast þekkingu og skilning á:

• Viðbrögðum ef slys, veikindi eða dauðsfall ber að höndum.
• Meðhöndlun helstu álagsmeiðsla og veikinda.
• Einkennum ofkælingar og hvernig beri að varast hana.
• Viðbrögðum við stórslysum og náttúruhamförum.

Nemandi skal hafa öðlast leikni í að:

• Veita fyrstu hjálp í ferðalögum í óbyggðum og öllum veðrum.
• Veita meðhöndlun við helstu álagsmeiðslum og veikindum.
• Greina ofkælingu og hvað beri að varast þegar ofkæling kemur upp.
• Halda samskiptum við flugmann þyrlu og velja henni lendingarstað.

Nemandi skal geta hagnýtt þá almennu þekkingu og leikni sem hann hefur aflað sér til að:

• Bregðast við hverskonar óvæntum uppákomum í gönguferðum í óbyggðum.
• Stýra aðgerðum á vettvangi og forgangsraða hinum slösuðum.
• Veita nauðsynlega fyrstu hjálp við meiðslum og veikindum.
• Búa um slasaða/sjúklinga, undirbúa flutning og flytja af slysstað.
• Geta kallað til þyrlu og valið henni lendingarstað ef þörf er á.
• Að veita áfallahjálp og sinna slösuðum og öðrum farþegum þar til hjálp berst.

Undanfari: Nemandi þarf að hafa lokið a.m.k. 10 einingum í kjarna leiðsögunáms, FYHJ3FH01.

Námsmat: Sjá kennsluáætlun.