VEFM3GÖ01 - Fjallamennska I - Vetrarferðamennska

Farið er yfir vetrarferðamennsku, sérstaklega m.t.t. öryggismála s.s. snjófóða. Fjallað er um nauðsynlegan búnað, leiðaval og snjóflóðahættu. Leiðbeint er um göngu í snjó og notkun ísaxar og ísaxarbremsa. Einnig göngu á mannbroddum og snjó- og ístryggingar. Kenndir eru helstu hnútar, meðferð línu og einfalt sig. Einnig er fjallað um gerð neyðarskýla og nemendur þjálfaðir í öruggu leiðavali. Áfanginn er að stærstum hluta verklegur úti í náttúrunni.

Nemandi skal hafa öðlast þekkingu og skilning á:

• Helstu undirstöðuatriðum í fjallamennsku til að hann geti bjargað sér í fjalllendi við íslenskar vetraraðstæður.
• Helstu tækjum og búnaði við fjallamennsku að vetrarlagi, s.s. að nota ísexi, mannbrodda og klifurbúnað í brattlendi.
• Helstu tryggingaraðferðum í snjó.
• Grunnaðferðum við mat á snjóflóðahættu.
• Gerð neyðarskýla að vetrarlagi.
• Mikilvægi búnaðar s.s. skó og mannbrodda, sigstól, hjálm, ísöxi, snjóflóðaýli, snjóflóðastöng og skóflu og hvernig búnaður er notaður.
• Eigin styrkleika og takmörkunum.

Nemandi skal hafa öðlast leikni í að:

• Bjarga sér í fjalllendi við íslenskar vetraraðstæður.
• Beita helstu tækjum og búnaði við fjallamennsku að vetrarlagi.
• Meta snjóflóðahættu.
• Útbúa neyðarskýli að vetrarlag.

Nemandi skal geta hagnýtt þá almennu þekkingu og leikni sem hann hefur aflað sér til að:

• Fara með ferðamenn í gönguferðir að vetrarlagi í íslenskum vetraraðstæðum.
• Meta aðstæður og gæta ítrasta öryggis.

Undanfari: Nemandi þarf að hafa lokið a.m.k. 10 einingum í kjarna leiðsögunáms.

Námsmat: Sjá kennsluáætlun.